RibeiraCrea Proxecta
O cineclube RibeiraCrea Proxecta nace da Asociación Ribeira Crea. Foi unha idea que se materializou grazas á realización do Etal Equal Festival na Praza de Teruel, en Ribeira. Grazas a ese cambio de localización, Ribeira Crea e o bar Cocoluche crean unha sinerxia entre cultura e hostalaría.
O proxecto estreouse o 10 de Decembro coa proxección de A poeta analfabeta de Sonia Méndez. Puidemos gozar dun bo rato vendo un filme, tomando algo nun bar que apoia ás actividades culturais e dun breve coloquio posterior falando das inquedanzas, anécdotas e apreciacións do filme e da propia vida de Luz Fandiño.
A nosa proposta é poder facer proxeccións mensuais de filmes maioritariamente galegos e en galego e invitar a cineastas, artistas e outras asociacións e entidades a colaborar en coloquios e presentacións de filmes nun espazo máis informal e moito máis familiar. Gozar dunha experiencia cinéfila máis cercana que non podemos ter nun espazo de cinema comercial estándar. Queremos crear un cineclube no que a xente se atreva a expoñer ideas, pensamentos e videoensaios sobre cinema.
Tamén queremos que o espazo do cineclube sexa un espazo que dea pé á creación e á proxección de pezas de novos talentos e novas artistas da zona, polo que antes de proxectar algúns filmes, proxectaremos pezas de novas creadoras para darlles visibilidade dende o noso espazo.
Queres proxectar algo?
Se tes algún filme en mente que che gustaría proxectar, algunha cuestión sobre cinema que che gustaría tratar nunha charla ou tes contido realizado por ti e queres usar o noso espazo, podes contactar connosco a través do correo ribeiracrea@gmail.com ou a través do formulario desta web.