Asociación Ribeira Crea
A asociación Ribeira Crea é unha asociación sen ánimo de lucro con intereses na promoción e divulgación artística e cultural.
O programa de actividades que pretendemos crear nace da necesidade de renovación da oferta cultural e artística do concello de Ribeira. Os obxectivos a acadar son:
- Realizar unha programación variada caracterizada sempre pola sinerxia da asociación con outros axentes sociais (comercio, hostalaría, asociacións veciñais e outras asociacións culturais).
- Xerar no concello de Ribeira grupos e colectivos con intereses artísticos e culturais que poidan xurdir grazas ás nosas actividades e que poden fomentar a inclusión da mocidade e do talento emerxente.
- Crear proxectos enfocados a públicos diversos e amplos, é dicir, todas as actividades que programamos son para tódolos públicos e para desfrutar en familia.
- Facer de Ribeira un concello no que a cultura e o arte formen parte do día a día e no que as artistas sexan quen de exhibir as súas obras co recoñecemento merecido. Pretendemos que a mocidade de Ribeira non sinta a necesidade de procurar unha programación cultural fóra do seu concello.
En definitiva, queremos ofertar un programa contracultural que fuxa das programacións estándar que non favorecen a diversidade e inclusión culturais e que non fomentan a participación de tódolos colectivos da sociedade.
Que facemos?
A nosa asociación leva tan só 2 anos de percorrido, polo que as actividades realizadas ata agora son moi poucas. Tódolos nosos esforzos dedicáronse á realización do Etal Equal Festival, un festival de músicas diversas no que predomina a diversidade de xéneros musicais e a promoción de artistas galegas.
En 2023 realizamos a segunda edición do Etal Equal Festival, inauguramos o Cineclube RibeiraCrea Proxecta e lanzamos os obradoiros Pequeno Audiovisual durante as vacacións de Nadal para nenas e nenos de 6 a 12 anos.
Para este ano 2024 temos moitas cousas novas a ofertas, pero todas están aínda en proceso de creación. O que temos claro é que imos a pola terceira edición do Etal Equal Festival, continuaremos programando filmes mensualmente para o cineclube Ribeira Crea Proxecta e faremos máis edicións do Pequeno Audiovisual.
Algunhas das actividades que estamos preparando son:
- Festa Pre-Etal Equal Festival: unha pequena promoción a pé de rúa do Etal Equal Festival con grupos locais de música diversa para comezar o verán animadas!
- Vinde! Mercado de segunda man: toda a roupa que xa non usas non a subas a ningún lado, véndea en comunidade e a pé de rúa, con música en directo e rodeada das túas veciñas! Isto é Vinde, o mercado de segunda man de roupa e accesorios que temos pensado realizar sobre o mes de Maio.
- Roteiro xeolóxico-fotográfico: organización dun roteiro xeolóxico polo Barbanza. Como valor engadido desta actividade, imos introducir, non só divulgación xeolóxica e ecolóxica sobre os nosos montes, senón tamén fotográfica. As persoas que asistan terán un taller de fotografía para sacar imaxes da ruta e organizaremos unha exposición posterior.
Queres colaborar connosco?
A nosa asociación é sen ánimo de lucro, facemos todo por amor á cultura, ao arte e ao noso pobo. Se ti tes as mesmas inquedanzas e motivacións ca nós, podes unirte!!
Tes opción de colaborar con Ribeira Crea de varias formas:
- Economicamente: podes facerte socia pagando unha cota mensual de 10€ ao mes con tódalas vantaxes de ser socia (propoñer actividades que che interesan, descontos en actividades, asistir a reunións e asambleas, utilizar espazos e materiais da asociación, etc.) ou podes mercar o merchandising oficial do Etal Equal.
- Voluntariamente: podes compartir o que facemos, atraer xente ás nosas actividades, propoñer actividades ou asistir de xeito voluntario a botarnos unha man nos eventos que realizamos.
